بدوي يكمل دراسته

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
صحراء….بيوت شعر…… 270 راس من الغنم……34 راس من الابل ….(الله يشرفكم) كلبين لزوم الحراسه …..وايت ما قديم لزوم تموين الجماعه بالمويه……الموقع في الربع الخالي …..مجموعة عوايل بدويه جدا، تنتمي الى قبيله عريقه من قبايل الجزيره ساكنين في ها الجزء الصغير جدا من فضاء الربع الخالي مثل ما ذكرت. في لهجتنا البدويه البحته نسمي مجموعة الناس اللي تعرف بعض وساكنين في نفس المكان في البر نسميهم (جماعه). ولدت في البدو وعشت وربيت……الغريب جدا ان ابوي الدكتاتوري القوي جدا وافق اني ادرس رغم اني اصغر اخواني الاربعه اللي يعتبر اكثر واحد مثقف فيهم خريج صف ثالث ابتدائي مكافحه;). انا درست وما راح اقول لكم المآسي والبلاوي اللي كنا نواجهها بس على شان نروح او نجي للمدرسه ، ما بالكم بغيرها . على العموم خلصت الثانوي-علمي، واللي حولي كلهم كانوا يقولون اني عبقري وفعلا خلصت الثانوي بتقدير امتياز وكانت النسبه 97 في الميه:14: طبعا النتايج اخذناها من المدرسه بعد كل الناس ما خذوها اللي بالتلفون واللي بالجرايد وغيرها. النتايج كانت تظهر في الجرايد واكثر الناس تقريبا تعرفها منها ، بالنسبه لنا ما نعرف شي اسمه جرايد ولا نعترف بها :) :....طبعا ممكن تقيسون على هذا باقي وسايل الاعلام مثل التلفزيون اللي كان جدتي الله يرحمها اذا جابوا طاريه الناس اللي يجون من المدينه كانت تسميه (النصراني) ::) .....الراديو او الرادي مثل ما نسميه كان هو الوحيد الموجود ......رادي روسي قدييييييم مره وكان موجود بس عند واحد من الجماعه يشغله للصبح على شان يسمع الناس القرآن. واحد من اعمامي كان هو الوحيد اللي موظف في المدينه وكان يروح لشغله(كان يشتغل خوي فى الاماره) اسبوع ويجينا سبوعين وكان عنده سياره حوض وكل اسبوع اذا كان موجود ياخذ الشيبان ويروحون يصلون الجمعه وكان يمر على الاماره ويشيل كل الجرايد اللي هناك لأن اكثر الناس ما تاخذها ويجيبها ...طبعا ماهو بثقافه والا زود علم لانه مايعرف يقرا اصلا بس كان جزء منها نفرشه سفره والجزء الباقي تاكله الغنم (تصدقون.....يعني غنمنا مثقفه اكثر منا)(101)....نتيجة الثانوي كانت في بعض ها الجرايد ومع ذلك ما درينا عنها. ذاك اليوم يوم اني اخذت النتيجه وجيت اول واحد قابلته ابوي قلت له(يبه يبه ابشرك نجحت بممتاز) عارفين وش قال لي ....قال : بركه افتكينا من هالدراسه ....يالله يالله خلنا نروح نجيب (الفاجر) :من عند فلان. انتهى كلام ابوي.....طبعا الفاجر هو اسم بعير كان الوالد يعزه كثير وبدون مبالغه كان يعزه ويعز بعض الحلال اكثر منا حنا يا عياله. ::80: على العموم قلت له ابشر بس خلني اسلم على امي ودخلت وسلمت عليها وعلى خواتي وبشرتهم ......قالت امي بسوي لك براد شاهي (جايزة النجاح) (101) الشاهي في ذاك الوقت كنا نعتبره شراب الارستقراطيين لان وجوده كان نادر جدا وكانت القهوه العربيه هي المشروب الرسمي....الاكل طبعا كان بسيط ثلاثه او اربعه اشياء رئيسيه تدخل في عمل عدة اصناف ...الاشياء الاساسيه هي :البر...اللبن...اللحم...التمر(الرز ما كان موجود بتاتا مو لان حنا ما نعرفه بس كنا ما نحبه) . على العموم رحت مع الوالد ورجعت بسرعه وطول الطريق رايح
جاي وانا تفكيري في الشاهي.:31: :لاحظوا واحد مخلص ثانوي علمي وجايب ممتاز ويفكر بس في الشاهي.....‍‍‍‍‍‍‍
عودت ألين العجوز والبنات جهزوا الشاهي وسووا قعنون بر على الصاج.....وقمنا نشرب من ذا الشاهي ونرقى من ذا الخبز ما راح اقول لين شبعنا بقول لين خلصناه......طبعا شاهي الباديه دايم يسوونه على النار ويزودون السكر لان الاكلات الحاليه عندهم قليل جدا....وطبعا شاهي امي كان (عسل مره) من كثر السكر......وذاك اليوم طبعا قضيت اكثر الوقت برا البيت ماهو لاني ابغا اتمشى ولا فرحان بعد الامتحانات لا والله من المغص اللي ذبحني بعد الشاهي (101)

المهم بدت اجازة الصيف وما تتخيلون كل الهم كان بامور الحلال والرعي والبحث عن اماكن جديده فيها مراعي وتزين للسكن…:
…قبل نهاية الاجازه بحوالي شهر ونص كان فيه عزيمه في بيت عمي (المناسبه كانت ختان) البدو عادة يحتفلون بختان الذكور……وفي ها المناسبه جاونا ناس من جماعتنا الحضران وكان معهم مجموعه من عيالهم اللي هم اصلا كانوا زملائي في المدرسه. ذاك الليل كان ها الشباب ما لهم كلام الا التسجيل بعد الثانوي ……(وين سجلت …؟…وين بتروح…..؟؟ وش ناوي عليه…؟؟…) يعني من ها القبيل …وطبعا اخوكم اللي هو انا نايم في العسل ومشغول بحلال ابوه ….;).ومعني نفسي ذاك الليل بصب القهوه للضيوف. راحوا الدفعه الاولى يتعشون اللي هم الشيبان ومتوسطين السن…وبقي الشباب…..طبعا ما هو احترام او تقليد لكن الحضور اكثر بكثير من العشا..!!!. كانت فرصه اني اسولف انا والشباب اللي كانوا زملاي في المدرسه….وقاموا يشجعوني ويقولون معدلك عالي وكل الجامعات والكليات بتقبلك …..وحرام تضيع ها الفرصه…..وقالوا بعد… ان التسجيل بدا وانهم راح يمشون بعد اسبوع مع بعض يسجلون اللي في الرياض واللي في جده واللي في الشرقيه. انا بديت افكر…..يعني لازم اكمل دراستي وايش يعني لو كملت؟؟؟…طيب وحلالنا وعيشتنا….ابي اخواني…امي…..هلي …جماعتي…….وهذا كله كوم ومفاتحة الشيبة في الموضوع كوم………هذي البلشه. فكرت في الموضوع وقلت ليش لا خلني اجرب يمكن يكون في مواصلة الدراسه خيره،
وبعدين لو فشلت او ما عجبني الوضع برجع وما وراي احد بيقول لي شي بالعكس الوالد ابرك ما عنده اذا رجعت…هذي خلصنا منها..زين الحين الشيبة كيف ناصله وهو اللي يا الله خلاني ادرس جنبه في نفس المدينه ما بالكم اذا قلت مدينه ثانيه….فكرت وشفت ان احسن شي اني اوصله عن طريق شخص غيري. رحت لعمي الموظف راعي الجرايد اللي قلت لكم عنه وقلت له الموضوع وكان اصغر من ابوي بس العلاقه بينهم قويه وقلت له على الموضوع….طبعا في البدايه حاول يقنعني ان الدراسه ما فيها خير واحسن لك تجلس عند ابيك وتنفعه وتنفع حلاله ….وتعرس وترتاح…واذكر انه قال لي بالحرف الواحد….(ياولدي وش تبا من الدراسه تراها ما نفعت اللي ضيعوا حياتهم في الطراد وراها….:)81: ).وبعدين انت معك منها خير وش عاد تبا….) كلام منطقي صح..؟؟؟؟….ضغطت عليه وقلت له ابى عنده خواني وفيهم خير وانا بس بطلع اجرب اذا ما ارتحت برجع، وابى بعد قوي ويقدر على تصريف حياته بنفسه…..المهم قال لي….(خلاص بنشوف)….انا طبعا طلعت في راسي وقلت له التسجيل بيبدا ولازم امشي الاسبوع الجاي واللي يجي متأخر ما يسجلونه وبعدين ابا اطلع مع العيال (زملاي). قلت له الليله بعد صلاة المغرب …وبصراحه وافق بس ببروود ومن غير اقتناع. صلينا المغرب وكان اصعب مغرب في حياتي لدرجة اني الى الحين ما ادري صليته ركعتين ولا ثلاث ولاخمس……الخوف ما هو من ان ابى ما يوافق..الخوف من انه يتوطا بطني …وانتوا ما تعرفون ابي فنان في ها الحركات. بعد الصلاه جبت القهوه وصبيتها والعم كان ناسي بس يوم شافني اصب القهوه تذكر وبرز بايى على جنب وقال له الموضوع وما ادري العم كان معي ولا علي. نادوني معهم وهنيا بدت العظام ترقل ، قال ابي وش ها الكلام وش تبا بالدراسه …وحلالنا ….(لاحظوا الحلال دايم يجي في المرتبه الاولى …يعني اتوقع لو خروف من الحلال بيطلب من ابوي يسفره لامريكا يدرس بيسويها لانه يعزه مره…؟؟؟!!)
.ما دريت وش اقول …استجمعت كل القوى اللي عندي وقلت كل اعيال الجماعه بيروحون يدرسون برا (مدن ثانيه)….(وعلى فكره البدو احيانا يسفهون الحضر وما يبونهم يتقدمون عليهم) قال لي من العيال؟ قلت عيال جماعتنا اللي بالمدينه ….قال لي طيب كم بتجلس ووين بتروح…؟.قلت مادري تعتمد على المكان اللي بسجل فيه. يوم شاف اني مصمم …اسمعوا وش قال ….! قال (طيب ليش ما ترجع لمدرستك لوله وتكمل فيها….::eek: :.)…..لاتعليق….!بعد محاولات وضغط من طرف اخواني …امي اللي ما كانت اصلا مستوعبه الفكره ولا مصدقتها بس كانت معي…..صار الى ماتوقعتة....
نكمل السالفه بعدين ان شاء الله....
 

مواضيع مماثلة

هيفا

عضو جديد
إنضم
10 مايو 2006
المشاركات
119
مجموع الإعجابات
0
النقاط
0
:85: حلللللوة ....كملها بسرعة ،شو صار بعدين:70:
 

فتوح

مشرف
إنضم
25 مارس 2006
المشاركات
4,389
مجموع الإعجابات
541
النقاط
0
والله إنها لرائعة خوى بدوى
أنا في انتظار التكملة عاجل جداً
وان شاء الله تكون خير
 

إسراء

عضو جديد
إنضم
20 أبريل 2006
المشاركات
629
مجموع الإعجابات
0
النقاط
0
قصة حلـــــــــــــــــــــــــــــوة وفي إنتظار التكملة
 

المهندس مهند

عضو جديد
إنضم
16 فبراير 2005
المشاركات
843
مجموع الإعجابات
5
النقاط
0
[glint]الموضوع شيق حقيقة ومعبر عن حال الكثيرين

في انتظار التكملة[/glint]
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
السلام عليكم ورحمة الله وبركاته
انا اسف يا شباب اني تاخرت ما كملت السالفه والسبب بصراحه اني ظنيت ان المشرفين ما نزلوها
لاني جديد على المنتديات (ما عندي خبره:confused: ) وما كنت اتوقع ان الموضوع وصل الصفحه الرابعه
وابشروا راح اكمل القصه قريبا ان شاء الله

take care every body
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
أبشركم وافق

المهم
بعد مشقه ورجاوي وعقُل وغتر طاحت بين ايدين الوالد وافق صحيح اني ارتحت بعد هاالموافقه بس كان فيه شعور باني تايه واني بسافر بدون اي هدف او خطه وهذا شي طبيعي بالمقارنه مع طبيعة المجتمع اللي خارج منه.على العموم الحين جا وقت ترتيبات السفر اللي ما تعودنا عليها ولا فيه احد من الجماعه يعرفها ، بس ها المره جات من الوالد
قال لي جهز نفسك على شان تروح معنا للمدينه ونحطك عند ابو فلان (واحد من الجماعه اللي ولده بيسافر معي) على شان يدبرونك مع عيالهم اللي بيسافرون. بيني وبينكم انا ما تعودت على المدينه وعيشتها والسبع ساعات اللي كنت اقضيها في المدرسه كنت اشوف انها واجد وودي ارجع للبر بسرعه (لاحظوا التناقض رغم اني راح اودع البر نهائيا ) المهم رحنا للمدينه وعطاني ابوي فلوس صدقوني ما ادري هي كانت اقل ولا اكثر من حق التذكره ولا لا ، قال عطها ابو فلان يسنع لك السفر. تغدينا عندهم ذاك اليوم وبعدين تركني ابي وراح وقال بمر عليك بكره للعصر ومن الاشياء الزينه اني والحمدلله كنت مقبول من الجميع ما اذكر ان فيه احد ابدى لي عدم رغبته فيني او حقده علي، (ثقة زايدة(*
X) )على شان كذا كنت محل ترحيب مره من هاالناس وكانوا مهتمين فيني (لا تسألوني عن اكلهم لانه كان عجيب غريب علي وكان بالالوان خصوصا الحلويات) تصدقون اكلهم جلست مده اسولف لهلي عنه في البر:p
.

المهم حجزنا واخذنا التذاكر والسفر بعد اربع ايام ها الاربع ايام كانت مليانه حزن ودموع ومحاولات اخيره لتغيير راي عن الدراسه برا بس انا كنت متمسك رغم اني كنت متأثر جدا خصوصا بدموع الوالده. مرت ثلاثة ايام على نفس الحال ولازم اروح لجماعتنا في المدينه قبل السفر بيوم في اليوم الثالث يوم الوداع مسكني ابي على جنب واسمعوا زين وش قال لي( الله الله في الرجله وفي الصلاه والدين وترى ما ودي اسمع انك صرت مدرس (101)(101)(لاحظوا مدرس اعلى درجه علميه يعرفها!) بس ماتكرم ضيوفك ولا تساعد اهلك اذا لفوا عليك ويلك ثم ويلك لجاني خبر انك فشلتني ولا مشيت في دروب السرسره (الفساد).. وانتبه من اعيال الحرام واذا نمت عند احد لا تنام قبله خله ينام لاول ...ولاتمشي الا مع عيال ربعك وعيال القبايل).....نصيحه ذهبيه صح. (*
X)
عطاني مبلغ كان حوالي سبعميه اوالف ما اذكر امي بعد قامت تحط لي من ها الاكل في الشنطه ودعت اهلي والجماعه كلهم نفر نفر وخروف خروف على شان (الوالد مايزعل)(101) ومشينا وكان المشوار مدته حوالي ساعتين وعليها وكان اطول مشوار في حياتي لانه مليان نصايح مالها لزوم حطوني عند الجماعه في المدينه وجا موعد الرحله وكنا اربعه وكنت انا اكثر واحد فيهم كشخه (*
X)طبعا الحين انا مقبل على تجربه غريبه غير علقات الوالد وتسحيباته والخوف منه تجربة الطياره.ما تتخيلون انها جاتني لحظه بغيت اغير رايي وارجع كله بسبة الطياره تماسكت وركبنا الطياره وكنت مبتسم ابتسامه اخفيت وراها كميه رهيبه من الخوف :o اقلعت الطياره وما ادري كيف اوصف الشعور على العموم بعد ما ثبتت السرعه جاب المضيف الجرايد وكنا ثلاثه الشباب وانا جالسين جنب بعض والرابع جالس في مكان ثاني وعلى شان انا (ستيك) وما ني بوجه طيارات حطوني على الدريشه على شان اشوف المهم جاالمضيف بالجرايد اللي علاقتي بها سيئه ووزعها يوم انه عطانا الجرايد شفت خويي اللي جالس على الممر حط يده في جيبه وانا عاد ما كذبت خبر طلعت فلوسي واقوم احلف ابي احاسب على الجرايد طبعا المضيف انبهر واخوياي اللي تفشل واللي ضحك وقال المضيف (يابو الشباب هذي بلاش) :eek:طبعا انا فضلت اني اقلب وجهي واجلس اشبح مع الدريشه احسن لاني عارف الجرايد بدت تنتقم مني على فكره انتوا عارفين ليش خويي حط يده في جيبه ابد كان يبغى يطلع سبحته على العموم مضت رحلة الطياره على خير واكتشفت بسرعه انها ممتعه وتصدقون قمت افكر واسأل الشباب اللي معي كيف الطياره تطير وقمت بعد اتذكر قوانين الفيزيا والرياضيات اللي درسناها ما طولت ها الحاله كثير ووصلنا الرياض وكنت قبل ما تهبط الطياره اشوف انوار المدينه من فوق (ما راح اقول لكم وش كنت اظنها لأنها قويه شوي...!!!!!)جلسنا في الرياض حوالي ساعتين وبعدين واصلت الرحله في طياره اكبر وناس اكثر وها المره كان فيه بنات يخدمون علينا في الدرجه السياحيه اللي ما دريت عنها الا في سنين متأخره بعد ما ركبت الطياره. رغم ان الرحله من الرياض للظهران كانت اقل من 45دقيقه بس كانت ممتعه جدا وصلنا الشرقيه الساعه 11 في الليل واخوكم زي الاطرش في الزفه ما غير امشي ورا الشباب وما على لساني غير (بروسكم...فوقها) ماهو لاني بطران الا من قلة الدبره. فيه اثنين من الشباب اللي معي لهم قرايب في جامعة البترول وكان فصل الصيف في اخره ورحنا لهم في السكن وجلسنا على قلوبهم بالرغم من فترة الامتحانات اللي كانت في ذروتها وحنا ولا هنا. زي ما قلت لكم لا خطه ولا هدف ما غير مع الخيل ياشقرا حتى السؤال كنت اخجل اسأل على شان ماحد يضحك على. بس الشباب ما قصروا قالوا لي انت معدلك عالي يعني قدامك ثلاث اشيا تسجل فيها ....جامعة البترول...ارامكو (ارامكو فيها نظام ابتعاث لامريكا لدراسة الهندسه والتخصصات العلميه)....والثالث كلية الطب...في جامعة الملك فيصل في الدمام. فكرت في كلامهم وقلت طيب ممكن اسجل فيها كلها واللي يجي يجي...قالوا عادي اذا ما تضارب وقت تسجيل واحد منها مع الثاني .....بيني وبينكم الطب ما فكرت فيه كثير...ماهو لانه صعب او ما اقدر عليه بس لان الفكره عن الطب ان شغلة الطبيب بس انه يضرب ابر ...لا ووين يضربها ..:o.كبدو ننسى او نتناسى انه يضربها في اليد او في اي مكان ثاني ونركز بس على (الفخذ) وطبعا وانا اكتبها لكم فخذ الحين ترى مهذبها كثير الاهل هناك في البر يسمونها اسامي عجيبه غريبه وعاد تعالوا قابلوني لو اني قلت للشيبة اني بطلع (تختور) على قوله. عموما ما علينا انا حطيت في بالي جامعة البترول وارامكو وبديت في اجراءات التسجيل وكانت ها الاجراءات في جامعة البترول اقل واخف اختبرنا اختبار القبول اليوم وبكره كانت المقابله الشخصيه وقرارهم بقبولك او لا وكان القرار بالقبول والحمدلله بالنسبه لأرامكو لا كانت اختباراتهم طويله ومعقده وتابعتها لدرجة ان الدراسه في البترول بدت قبل ما تنتهي.
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
تراني راعي طويله السالفه توها نكملها بعدين انشاء الله :85:
see you
 

إسراء

عضو جديد
إنضم
20 أبريل 2006
المشاركات
629
مجموع الإعجابات
0
النقاط
0
ومازلنا في إنتظار تكملة قصتك المليئة بالمغامرات ومشكووور
 

المهندس مهند

عضو جديد
إنضم
16 فبراير 2005
المشاركات
843
مجموع الإعجابات
5
النقاط
0
[glint]والله اندمجنا معك خالص يا عين السيح ارجو الا تطيل انتظارنا[/glint]
 

هيفا

عضو جديد
إنضم
10 مايو 2006
المشاركات
119
مجموع الإعجابات
0
النقاط
0
لازلنا بانتظار التكملة
 

م.العراقي

عضو تحرير المجلة
إنضم
1 يناير 2004
المشاركات
1,766
مجموع الإعجابات
19
النقاط
0
:) :) :) :) كمل كمل خلي نشوف تاليها وين قصتك :) :) :)
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
السلام عليكم....
مرحبا يا شباب
انا ما ودي اقطع القصه لكن مساحة الرد صغيره وما اعرف وش الحل (بدوي ماني راعي منتديات)
:81:
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
السلام عليكم.........
مرحبا يا شباب انا ما ودي اقطع السالفه لكن مساحة الرد صغيره
وماني عارف وش الحل(بدوي ما اعرف للمنتديات )
اذا تقدرون تساعدوني لاتقصرون
 

فتوح

مشرف
إنضم
25 مارس 2006
المشاركات
4,389
مجموع الإعجابات
541
النقاط
0
والله مشوقة يا أخي عين السح
في انتظار الجزء الثالث
أخوك فتوح
 

عين السيح

عضو جديد
إنضم
14 يونيو 2006
المشاركات
16
مجموع الإعجابات
0
النقاط
0
من المواقف الكثير اللي حصلت لنا في الشهر ونص اللي جلسناه موقف في مطعم الجامعه نظام المطعم ان الشخص يدخل وياخذ صحنه وعدته ويمشي وياخذ الاكل اللي يبي من على السير بعد ما تاكل مفروض انك تاخذ صحنك وتحطه على سير الغسيل وطبعا شباب والشغله في روسنا يعني بالبدوي الواحد منا يشوف نفسه (قاحش) وشلون انا ولد فلان اشل صحني المهم قمنا رغم ان العالم كلها كانت تشل صحونها بكل طيب خاطر حنا لا قمنا ولا عبرنا احد ويوم صرنا خارج المطعم الا واحد من عمال المطعم ينادينا بكل عصبيه ويقول (لازم انتا في يرجع يشيل صحن) طبعا كل واحد رد الرد اللي هو والعامل طلعت في راسه ما اطول عليكم مدمدناه خبط عمره ما شافه وحطينا ارجيلنا ولو احد عرف من اللي سواها ولا دخلنا الجامعه ولا غيرها طبعا انا ما اقول ذا الكلام وانا اتمدح بالعكس حنا بصراحه كنا غلطانين والف غلطانين وهذي ماهي بداوه ولا شهامه هذي بصراحه تخلف وشوفة نفس على خلق الله

ابقول لكم سالفه ثانيه بس لا تاخذون انطباع شين عني ….مره كنا في واحد من الاسواق الكبيره في الخبر وكالعاده نمشي شله عددها خمسه سته كنت انا في محل تصوير مع واحد من الشباب وجات وحده وبصراحه وبكل صدق والله ما اكذب عليكم قامت تلمح وتقول كلام كان بالنسبه لي في ذاك الوقت يعتبر مصيبه…كارثه……نهاية العالم……وبصراحه انا كنت المعني بالكلام عارفين وش سويت ….مسكتها مع كتفها وجريتها قدام العالم واقوم اصيح فيها واقول لها اقول لك قولي لي وين زوجك ( واحد حمار !!) طبعا تجمعت العالم وجا واحد من ها الناس كان عنده لحيه وكان حيل متهور(من الهيئه) تجاهل كل اللي سوته ومسكني انا مع كتفي وقام يقولي (اقول لك وين بطاقتك) طبعا تجمع اخوياي مع العالم وحاولوا يهدون ها الرجال ويهدوني بس بدون فايده اتهمني واخذني معه والله لايوريكم انحبست يومين وتبهذلت ها السالفه حولتني الى انسان ثاني على الاقل في مثل ها المواقف وصرت اتعامل مع مثل ها البنت بطريقه مختلفه تماما

ومره كنا معزومين في راس تنوره (60 كيلو من الظهران) انا ذاك اليوم كنت مواصل وما نمت ما هو لاني عاشق سهر لا ألا لني ما حصلت فراش ولا بطانيه تخيلوا سته في غرفه والفراش بالحجز يعني اللي يجي لول ياخذ فراش والشباب ما شاالله تحصلونهم مسنترين من المغرب في الفراش حتى احيانا اذا راح الواحد الله يكرمكم لدورة المويه اخذ بطانيته معه :
eek:

المهم انا ما رقدت وجا العصر وقالوا الشباب خلنا نمشي انا ما اقدر قلت بنام قالوا اجل فلان بعد عنده شغل بيخلصه وتعالوا اذا خلصتوا وهذا رقم التلفون اذا دخلتوا راس تنوره اتصلوا على شان ندلكم على البيت. نمت انا حوالي ساعتين وجاني الرجال ورحنا على سيارة واحد من الشباب المشكله الرجال ستيك زي محاكيكم وما يدل زين وانا سويت نفسي دليله وقلت الشباب وصفوا لي الطريق وتقريباعرفته مشينا وكانت البدايه زينه مسكنا اول الخط اللي كان مظلم وكان هاي واي قعدنا نسولف وانسجمنا مع الجو وعدينا التحويله اللي فعلا كانت صاده مرة وما تحس بها المهم مشينا ولا حتى فكرنا كم مشينا وفجاه جاتنا لوحه مكتوب عليها الجبيل الصناعيه (100 كيلو من الظهران) ما اهتمينا كثير وكنا نحسب ان الجبيل قريبه وذيك الايام الله لايردها كانت ايام الازمه وكان فيه تفتيش والسياره ما هي باسم احد منا ولا فيه رخص يعني الحاله ما نحسد عليها وقفونا الشرطه واخذوا البطاقات واسألوا عن اثبات السياره وهنيا كانت المصيبه بعد الطلايب والحلايف وقلة الحيا عطونا مخالفتين تصدقون أي والله وحده لي رغم اني ما كنت اسوق ووحده لخويي سألناهم وين راس تنوره وقالوا ارجعوا اربعين كيلو رجعنا وقعدنا نحش ونسولف أي والله عارفين وين وصلنا وصلنا الظهران مره ثانيه وفي ذاك الوقت قررنا ان حنا نروح نحجز بطانيتين وفراش من بدري ابرك لنا من المشاوير اللي مالها داعي وفعلا كلمنا الشباب وما قلنا لهم وش اللي حصل ونمنا

المهم بدت الدراسه في الجامعه وكان السنه الاولى يسمونها السنه التحضيريه وكانوا يركزون فيها على الانجليزي والرياضيات وبعض المواد الخفيفه اخذنا الكتب وبدت الدراسه الصدق من ثاني يوم وكل شي هضمته الا ها العنقريز والامريكان اللي يدرسونا بالانجليزي بصراحه الانجليزي كان من الاشياء اللي واقفة لي وعانيت كثير على شان اتمكن منه. في الجدول اللي عطونا ياه مكتوب اسم الماده واسم مدرسها وعدد الساعات ورقم الغرفه طلاب السنه التحضيريه كانوا في مبنى معزول شوي عن باقي مباني الجامعه وكان ها المبنى مكون من جزئين الاول الفصول الدراسيه والثاني مكاتب المدرسين اخوكم في الله راح يدور اول محاضره في مكاتب المدرسين وبالصدفه حصلت مكتب عليه نفس رقم الغرفه اللي مكتوب في الجدول وسنترت عنده حوالي نص ساعه يوم شفت الوضع غريب وما جاني احد الا اشوف لي انجليزي يمشي في السيب وطبعا اللغه صفر حاولت اتفاهم معه واشر له على الجدول ورقم الغرفه بس هو اخذها من قاصرها واخذني مع يدي وراح معي لين سلمني لمدرسي وحسيت انه يقول له ياخي انتبهوا لتيوسكم السايبه ذي :
o

وزي ما تعرفون بدت الدراسه في الجامعه وبدا الانتظام اللي فعلا ما تعودنا عليه في أي مرحله من مراحل حياتنا الدوام بصراحه كان طويل وممل وبديت أشتحن واحس باثار الحنين للباديه وعيشة الاهل تداهمني خصوصا في الليل طبعا الجامعه عطوني غرفه وكان معي فيها رسميا واحد من الشباب اللي كانوا معي في الثانوي هذا رسميا ولكن غير رسميا ما كانت تفضا من ضيوف ومتعطلين وغيرهم ومع ذلك كانت الحياه تمشي مثل ما قلت الحياه بدت تاخذ طابع الملل والرتابه القاتله خصوصا لشخص ما كان يعترف بحدود ولا جدران ولا قوانين وفجأه يلاقي نفسه في غرفه صغيره مع وجيه معروفه في مكان جدا محدود لدرجة ان ها الوضع اثر حتى في مستواي الدراسي وفي نفسيتي وبديت افكر في ارتكاب الكارثه وهي اني اخذها من قاصرها وارجع لامي وابوي وجماعتي) فيه شي ثاني بعد كان مكدرني وهو احساسي فعلا ان الفجوه الثقافيه والفكريه بيني وبين كل الناس اللي حولي كبيره جدا جدا أي شي يقولونه يفجعني واستغرب منه وما عندي عنه أي معلومات بفضل الناس اللي حولي وخصوصا انسان عزيز جدا علي تصبرت وبديت احاول اني انتبه للدراسه اولا واصغر الفجوه الثقافيه ثانيا بدا ها الانسان العزيز يجيب لي الجرايد كل يوم وحسن العلاقات المتوتره بينا وصرنا اصدقا كان مثقف جدا وعنده مجموعه كبيره من الكتب والروايات من كل الاشكال ولالوان لدرجة ان بعضها يتجاوز الخطوط الحمراء ::بديت اقرا وصار عندي فضول ثقافي كبير لدرجة ان محاكيكم بدا يقرا في الفلك في الابراج في الشعر وفي السياسه وفي العلوم وفي الاديان وحتى في السحر والخرافات وما كانت هاالحصيله كلها الا كميه صغيره من الوسيله اللي ممكن تضيق الفجوه بيني وبين المجتمع اللي حولي طبعا المبدا موجود الدين موجود الوفا للاصل والمجتمع موجود بس اللي تغير هو الوعي اللي اتعامل به مع ها الاشيا كلها ما اقول لكم ان ها الثقافه صارت في شهر او شهرين هذي بس كانت البدايه اختبارات ارامكو اللي قلت لكم عليها لازالت مستمره وفي يوم من الايام اتصل فيني واحد من الشباب اللي في ارامكو وانا كنت معطى مكتب التوظيف تلفونه وكانهم يبوني على شان الكشف الطبي اللي هو تقريبا اخر مرحله بعد ما اعجبتهم نتايج امتحاناتي وتقريبا قبلوني صمم الرجال الايمرني ويوديني للمستشفى وفعلا مرني للصبح ووداني وقال انا مكتبي قريب وانت شكلك بتخلص قرب الظهر اتصل فيني خلنا نتغدى سوى وافقت بعد الحاحه وفعلا خلصت حوالي حدعش ونص ومرني الساعه اثنعش وتغدينا في مطعم غريب عجيب داخل مكان في ارامكو اسمه (السنير) )وها المكان ببساطه قطعه من امريكا جايبينها للسعوديه بكل معاني الكلمه بصراحه جو غريب في ذاك الحي حريم امريكان لابسين زي ما يكونون في بلدهم وعايشين عادي جدااااا لا ويسوقون سيارات بعد ويطلعون للسوق يتقضون وفيه حريم محليات عايشين نفس الطابع بس مع فرق بسيط. الرجال ما قصر غداني وقال لي خلني امشيك شوي في السكن طبعا ما ادري وش اقول بس كان مره رايع. من المواقف البايخه اللي خربت الجو ومالها داعي اني شفت في السكن ولد صغير امريكي عمره حوالي ثمان سنين يلعب مع كلبه اللي كان كبر الخروف……انا طبعا ما ادري ان الولد يلعب مع الكلب وما ادري اصلا ان فيه ناس تربي كلاب وخصوصا ان الكلب كان شكله غريب وما هو زي سلوقياتنا اللي تحرس الغنم المهم انا شفت الكلب يطرد الولد والولد يجفل بسرعه ما دريت انهم يمزحون انا فكرت ان الكلب يبغى ياكل البزر قلت لخويي بسرعه (وقف…وقف…وقف) الرجال طبعا ما درى وش السالفه ووقف وانا ما كذبت خبر ونزلت من السياره واخذ ذيك الحصاة اللي لو رجمت بها جدار طيحته واطلقتها على الكلب الا وانا كاسر ساقه. استغربت يوم شفت الولد راح للكلب وانحنى عليه وقام يصيح ويبكي في البدايه جتني نشوة انتصار بس في النهايه جا الامن ولعنوا خامسي وخامس خويي اللي لعن خامسي قبلهم وعالجنا الكلب (قصدي رجل الكلب) وكلفنا الفين ريال هذا كله غير الشتايم والملعنه اللي كانت تنقال بالانقليزي بعد كذا ما عاد صرت الوم الوالد الى منه فضل خرفانه علينا بصراحه معه حق

بعد حوالي شهرين في الجامعه اتصلوا ارامكو وقالو انقبلت ولازم تداوم اليوم الفلاني




وش صار بارامكو تعرفون قريبا
 

فتوح

مشرف
إنضم
25 مارس 2006
المشاركات
4,389
مجموع الإعجابات
541
النقاط
0
ما زلت منتظر اللي صار في ارامكو
لا تغيب كتير
أخوك فتوح
 

هيفا

عضو جديد
إنضم
10 مايو 2006
المشاركات
119
مجموع الإعجابات
0
النقاط
0
ما شاء الله عليك اخي عندك أسلوب تشويق .
 

إسراء

عضو جديد
إنضم
20 أبريل 2006
المشاركات
629
مجموع الإعجابات
0
النقاط
0
أخوي ترى سوالفك حلوة لاتطول الغيبة نحن في إنتظارك
 

المهندس مهند

عضو جديد
إنضم
16 فبراير 2005
المشاركات
843
مجموع الإعجابات
5
النقاط
0
والله متنا من التشويق يا اخي عين السيح لا تطول علينا
 
أعلى