المفهوم الجديد للصايع - مقال جميل جدا

إنضم
28 يناير 2012
المشاركات
27
مجموع الإعجابات
0
النقاط
0
السلام عليكم ورحمة الله وبركاته

حذرنا الكبار _ وإحنا لسه عيال _ من الخطورة ان نصبح ( عيال صايعة ) ، فعندما تتأخر في العودة إلى المنزل بعد المدرسة يتم استقبالك بسؤال ( كنت فين يا صايع لحد دلوقتي ) ، وعندما يكون أول زرار للقميص مفتوحً ( ما تفتحش صدرك زي العيال الصايعة ) ، وكان هناك ارتباطاً وثيقاً بين الصياعة والتدخين والوقوف على النواصي ومعاكسة البنات ووضع الأيدي في الجيوب أثناء الكلام مع الأب وشرب القهوة والكلام في التليفون بالساعات والتزويغ من المدرسة والرسوب نهاية العام وارتداء القميص على اللحم



وكان لقب ( صايع ) لقباً مخيفاً نهرب منه ( وهو الواحد ايه غير سمعة وشوية حاجات فوق بعض ) وكنا نحرص على الابتعاد عن
أي شخص يحمل لقب ( صايع ) علشان الواحد ( ما يبقاش مشبوه)


ولكن بمرور الوقت حدثت طفرة ، لم تعد كلمة صايع شتيمة ، بل اصبحت وساماً يضعه الاخرون على صدر من يحوز اعجابهم ، ولم يعد الصايع هو الشخص ( اللي مش متربي قليل الادب اللي بيسقط دايما وقاعد طول النهار على النت وبيعلي صوته على اهله وبيسرق فلوس يجيب بيها سجاير ) هذا الشخص مبقاش اسمه ( صايع ) بقى اسمه ( مغفل )


ولقب ( صايع ) لم يعد ايضا مقصوراً على الاشخاص فهناك أشياء كثيرة ممكن تقول عليها صايعة

جهاز الموبايل اللي فيه كل الامكانيات اللي محتاجها واللي بتحلم بيها .. يبقى موبايل صايع

ممكن تلاقي جون صايع عبارة عن جملة بين 3 لاعبين سريعة ورشيقة وغير متوقعة

ممكن تلاقي بوستر لالبوم لمطرب متصمم بطريقة صايعة ومحطوط في حتة صايعة

ممكن تشوف فيلم نهايته غير متوقعة ولم تمر في خيالك تبقى نهايته صايعة والسيناريست اللي كتب الفيلم سيناريست صايع


وممكن بلد يتقال عليها ( بلد صايعة ) زي الصين اللي قدرت انها تخترق مصر بمنتجاتها ويبقالها في كل بيت مصري 20 منتج على الاقل ، وبالتالي يمكنك ان تقول ان ( الصينيين دول صايعين اوي )

أستطيع الآن _ و أنا ضميري مستريح _ أن أشجعك على أن تكون صايع ** بمعناها الجديد



للصياعة بمفهومها الجديد آداباً يجب الالتزام بها حتى تستحق اللقب

يعني عمارتين أدب و فدانين إجرام و 3 محلات احترام



• الصايع عمره ما يقول على نفسه أنا صايع عمرك شفت واحد ذكي ماشي يقول للناس ( أنا ذكي يا جماعة ) ؟


• الصايع يكره الفهلوة لأن الفهلوة سرقة ومجرد استغفال للناس ، الصايع يحترم ذكاء الآخرين

• الصياعة تعتمد على الثقافة العامة في كل المجالات ، يكفيك أن تعرف ( حاجة عن كل حاجة )

• الحظ قد يقودك إلى القمة ، والصياعة أن تحافظ عليها


• الصياعة إن بالك يبقى طويل ، وماتبدأش بالغلط ، وماتردش على اللي بيستفزك ، وانك تسامح الشخص اللي تقدر تنتقم منه بسهولة

• الصياعة انك ماتكررش نفس الغلط مرتين

• الصياعة انك تدي كل واحد حقه ، وتعرف قيمة اللي قدامك بالضبط


• الصياعة انك تبقى فاهم كويس انه : .......


• مش مهم انك تغير الكون .. المهم انك تخلي الكون مايغيركش

• الحب اللي بييجي بسرعة لازم يروح بسرعة (احتمال يكون صعب شوية بس مسيرة يروح)


• طبيعي انك تحس بالخوف .. بس اوعى تخلي ده يخوفك

• الأحمق هو الشخص اللي لسانه أسرع من عقله

• استمتع بالحاجات الصغيرة .. بكرة هتعرف إنها كانت كبيرة


• اتعلم تضحك على مشاكلك وأنت عمرك ما هتبطل ضحك


• الخط المستقيم اقصر طريق بين نقطتين والابتسامة اقصر طريق بين شخصين

• الصبر .. هو الحاجة الوحيدة اللي لازم تستعجل وأنت بتتعلمها

• وجودك في الحياة هدية ماحدش يقدر يقدمهالك غير ربنا وفيه ناس كتير بتيجي لهم هدايا قيمة الشاطر هو اللي يعرف يستفيد من الهدية اللي جاتله

• كل حاجة في الدنيا فيها شيء جميل ، بس مش أي حد يقدر يشوفه

• مش كل مرة تتعب فيها هتوصل للي أنت عايزه من غير ما تتعب


• الفهلوة سرقة .. وخد بالك مافيش طريق مختصر للمكان اللي يستحق إن الواحد يروحه

• حياتك فيلم ، واللي حواليك بيلعبوا ادوار أب وأم وجار وصديق ، بس أنت بطل الفيلم .. حاول دايماً تتصرف زي الأبطال

• اخطر عيب في البني آدم انه مايشوفش في الناس غير عيوبهم


• الصديق الجيد هو الهدية الوحيدة اللي الواحد بيقدمها لنفسه بنفسه

• الصديق الكويس هو اللي يبقى عارف كل عيوبك ومع ذلك بيحبك


• اول خطوة للنجاح انك تعرف انت عايز ايه بالضبط


• ابتسامتك في وش أي حد هتخليه صعب انه يكرهك


• مش مهم كل الناس تحبك .. المهم انك تحب كل الناس

• عمرك ما هتعرف قيمة المياه من غير ما تعطش ، وعمرك ما هتعرف قيمة الصح من غير ما تغلط

• مش أي هدية ينفع تقبلها لازم تكون من قيمتك و ماتقولش النبي عليه الصلاة و السلام قبل الهدية قبلها لأنها من قيمته

• ماتسيبش الريموت كنترول في ايد حد إلا لو كنت بتثق فيه


• ما تصدقش اللي يقولك ( هيا كده ) أو ( هيا ما تتعملش غير كده ) كل الحجات بنفع تفكر فيها من أول وجديد حتى لو قالولك دي ثوابت وخليك فاكر إن السباحة لو كانت بتخسس _ زي ما بيقولوا _ كان الحوت بقى سمكة زينة من زمان

• مافيش حاجة اسمها حظ ومحظوظ هو مجرد شخص عارف هو عايز ايه وبيقدر يستغل كل الحجات اللي بتقابله في السكة لمصلحة الحاجة اللي هو عايزها

• اوحش حاجة انك تكون ما بتعملش حاجة لانه هيبقى صعب تعرف هتخلص امتى


• الوقت اللي هتضيعه في التفكير في الحاجات اللي ناقصاك المفروض تديه للتفكير في الحاجات اللي عندك

• الخبرة هيا الحاجة الوحيدة المفيدة في الفشل


• العقل زي البارشوت .. مش بيشتغل غير لما يتفتح



و بكدا أكون خلصت معنى الصياعة الجديد

فيا ترى هتكونوا صايعين جداد معذرة للفظ
ولا هتكونوا صايعين قدام (مغفلين )

وفى النهاية كلنا ناس محترمين والحمد لله ولكن فقط ننظر من حولنا لنرى المفاهيم الجديدة والاساليب الجديدة - ونرى العالم يتغير ومن هنا يجب علينا المشاركة فى منتدانا الجميل عشان نضحك ونتعرف ايضا على الدنيا دى

اوعوا تزعلوا من المشاركة دى ياجماعة - انا حبيت اشارككم الرأى فقط

تحياتى
 
التعديل الأخير:

يوسف الغريب

عضو جديد
إنضم
26 يوليو 2009
المشاركات
3,071
مجموع الإعجابات
251
النقاط
0

ماتسيبش الريموت كنترول في ايد حد إلا لو كنت بتثق فيه
تعبير حلو



 
إنضم
28 يناير 2012
المشاركات
27
مجموع الإعجابات
0
النقاط
0
تسلم تسلم اخى يوسف الغريب على ردك واتمنى يكون الموضوع عجبك

تحياتى لك دايما
 

نجدت كوبرلي

عضو جديد
إنضم
30 أبريل 2006
المشاركات
3,162
مجموع الإعجابات
337
النقاط
0
خلي بالك من الـ PASSWORD بتاعت الـ e-mail وانت في الـكوفي شوب
ليكون واحد صايع بيتجسس علك ويسرق الايميل بتاعك ويمل بيه العمايل


اوعى تدي الباسورد بتاعتك عند الاشتراك باي موقع .. حيسرقوا الايميل بتاعك

تحياتي​
 
أعلى