الحلقة الثانية عشر

الفارس الملثم

عضو جديد
إنضم
5 فبراير 2008
المشاركات
2,521
مجموع الإعجابات
207
النقاط
0
(12)


بسم الله الرحمن الرحيم


منظمة هذا لك ! الدعوية
807617656vdferb0.gif


تقدم
roqigo3.gif



الحلقة الثانية عشر

هل أنا غير عادي ؟




في اليوم التالي قابل خالد أحمد في الكلية، فأسرع إليه قائلا


خالد: السلام عليكم.. أهلااااااااان وسهلاااااااااان

أحمد: وعليكم السلام ورحمة الله وبركاته.. إزيك يا فتى الإسلام

خالد: الحمد لله رب العالمين.. عايزك ضروري

أحمد: من أولها كده هههه.. ربنا يستر.. قول يا عم

خالد: بص يا سيدي، ووطي صوتك، بالنسبة للكشكول اللي كلمتني عليه امبارح.. أنا عندي كذا سؤال
دلوقتي أخللي كل قسم من أقسام الكشكول يبدأ بصفحة فاضية ولا لأ؟
القسم بتاع الخواطر هأكتب فيه إزاي؟
وبالنسبة لمسيرتي نحو الرقي لازم أكتب فيها كل يوم ؟؟
و..


قاطعه أحمد: إييييييييييه يا عم خالد فيه إيه.. كل دي أسئلة
يا باشمهندس أنا بأقولك ده كشكولك يعني براحتك خالص.. يا عم اكتب فيه زي ما أنت عايز.. براحتك بجد.. المهم تستفيد أنت منه..


خالد: يعني أبوظ فيه براحتي ؟

أحمد: أيوننننن براحتك خالص.. الهدف من الكشكول أنه يبقى حاجة قدامك على طول تفكرك بجهادك مع نفسك.. وتكتب فيها أي حاجة عايز ترجعلها.. زي مثلا أي خطوات نتفق عليها إن شاء الله، وهكذا..

خالد: الحمد لله رب العالمين


...
تفرق خالد وأحمد وانشغل كل منهما في المحاضرات والأصحاب..


بعد يومين فتح أحمد الماسنجر كعادته في نهاية الأسبوع، فوجد خالد داخلا باسم "ياااااااا رب"، بدأ أحمد الحوار مشاكسا إياه..


غفرانك إلهي: ياااااااااا رب

ياااااااا رب: ياااااااا رب

غفرانك إلهي: ياااااااا رب

ياااااااا رب: عايز إيه يا عم

غفرانك إلهي: بأرخم عليك.. عندك مانع ؟

ياااااااا رب: طب مش تقول سلام عليكم ولا حاجة

غفرانك إلهي: آسف.. السلام عليكم ورحمة الله وبركاته

ياااااااا رب: وعليكم السلام ورحمة الله وبركاته

غفرانك إلهي: ها إيه الأخبار ؟

ياااااااا رب: الحمد لله على كل حال

غفرانك إلهي: كان الرسول صلى الله عليه وسلم إذا رأى ما لا يعجبه قال "الحمد لله على كل حال"

ياااااااا رب: ما أنا عارف
sad.gif


غفرانك إلهي: يعني أنت رأيت ما لا يعجبك ؟؟

ياااااااا رب: الحمد لله على كل حال.. أيوة

غفرانك إلهي: خير يا عم فيه إيه

ياااااااا رب: حالي مش ولابد برضه.. لسه مش أوي

غفرانك إلهي: معلش يا أحمد الموضوع محتاج صبر وجهاد كبير صدقني

ياااااااا رب: أحمد.. أنا بيدور في ذهني تساؤل.. مش عارف معايا حق ولا لأ

غفرانك إلهي: خير إن شاء الله.. إيه هو ؟

ياااااااا رب: هل أنا غير عادي ؟


غفرانك إلهي: لأ أنت خالد
biggrin.gif


ياااااااا رب: هههه.. لأ بجد.. هل أنا غير عادي ؟

غفرانك إلهي: طب فهمني يعني، هو لازم أقولك يعني إيه ؟

ياااااااا رب: بص يا سيدي.. أنا يا خالد الحمد لله رب العالمين كنت من فترة مش قصيرة موضوع فتنة النساء ده مش واخد معايا الشكل الكبير ده.. أكيد كان موجود بس أنا حاسس أنه بيكبر ويزداد سوءا معايا.. عمال ياخد حيز أكبر في حياتي كل شوية..


غفرانك إلهي: تمام.. كمل

ياااااااا رب: فأنا بأسأل نفسي.. إيه اللي حصل في حياتي خللى الموضوع يكبر معايا بالشكل ده ؟؟
هل ممكن أكون أنا غير بقية الناس ؟ يعني معلش في اللفظ،هل ممكن أكون ربنا خلقني طبيعتي مختلفة عن بقية الناس بحيث موضوع الشهوات ده واخد معايا حيز أكبر من الطبيعي؟ أكون يعني - آسف - شهوتي أكبر من الطبيعي ؟
أو حاجة تانية.. هل ممكن أكون اتحسدت لأي سبب فبقيت بالحال اللي أنا فيه ده ؟


غفرانك إلهي: طب وليه ماتقولش أنك بسبب أن الموضوع بقاله فترة طويلة، فبيزداد سوءا، زي أي معصية الواحد بيعملها بتزيد معاه.. وأنت عارف المعصية بتجر المعصية وأن الشيطان مش هيسيبك تقف عند حد معين ويقولك كفاية ؟
معلش سامحني بس أنا بأكلمك بصراحة


ياااااااا رب: ولا يهمك يا عم.. ده احتمال برضه بس مش عارف.. طب أعرف إزاي ما هي كلها احتمالات واردة..

غفرانك إلهي: ويمكن حد عامل لك عمل بحيث تفكيرك يبقى موجه للحوارات دي
biggrin.gif


ياااااااا رب: شكلك بتتريق، صح ؟

غفرانك إلهي: لا والله مش قصدي.. بص يا خالد... فيه نقطتين..
أول حاجة موضوع أن ربنا خلقك بحيث موضوع الشهوة عندك غير عند غيرك، أو بالوراثة أو أيا كان، فمعلش دي حاجة مش هتقدر تتأكد منها حاليا.. صح ؟ يبقى معلش يعني تنساها تماما وماتعلقش عليها أي حجج..
يعني ماتخليهاش باب الشيطان يدخل لك منه ويقولك أنت غير التانيين.. ده هم عاديين إنما أنت عندك عذر شرعي.. أنت مخلوق كده ولازم تفرغ طاقتك دي.. لو ماعملتش مش عارف إيه هتتعب وتموت..
اعذرني بس ده كلام فارغ، لأن كده هتقعد تبرر لنفسك أي حاجة بتعملها.. ولو كل الناس فكرت بالمنطق ده ماحدش هيغير من نفسه ولا يصلح منها أبدا.. صح ولا غلط ؟


ياااااااا رب: بصراحة صح.. بس مش يمكن حقيقة ؟

غفرانك إلهي: يمكن.. الله أعلم.. بس حتى لو حقيقة هتعمل إيه يعني ؟؟ خلاص هتفضل على ما أنت عليه ؟؟ معلش يا خالد احنا حتى ما بدأناش ناخد خطوات عملية ونحاول ونتعب عشان نقول مش هنقدر.. أنت كده بتطبق نظرية الشوال..

ياااااااا رب: شوال إيه ؟
biggrin.gif


غفرانك إلهي: نظرية الشِوال.. الشيخ أبو إسحاق الحويني ربنا يحفظه بيضرب مثل.. بيقولك لو عندك خادم وقلتله روح شيل الشوال اللي هناك ده انقله لمكان تاني.. فبص للشوال كده وقالك ده كبير أوي وأنا مش هأقدر.. قلتله بس روح حاول قالك مش هأقدر
رحت قلت لخادم تاني قام بص للشوال، بس راح ناحيته وحاول يشيله، لقاه تقيل وماقدرش فعلا.. حاول بجد وبدأ يحركه بس تعب ووقع منه..
إيه رأيك في الاتنين دول ؟


ياااااااا رب: ربنا يكون في عونهم.. مالهم بقى ؟

غفرانك إلهي: أنت كسيّد للخادمين دول.. هتعاقب الخادم الأول لأنه محاولش أصلا.. لكن هتتعاطف مع الخادم التاني اللي حاول وماقدرش وتجيب له مساعدة.. صح ولا غلط ؟

ياااااااا رب: تمام

غفرانك إلهي: ولله المثل الأعلى.. ماتقولش مش هأقدر من غير ما تحاول أصلا.. كل اللي بنعمله ده يا خالد لعب عيال.. لما تحاول بجد وماتقدرش ساعتها ربنا سبحانه وتعالى مش هيخذلك.. سبحانه
طالما بتجاهد نفسك لله، يبقى لما تحاول وماتقدرش ثق أن ربنا هيمدك بمدد ومعونة من عنده عز وجل


ياااااااا رب: كلام جميل.. يعني أنت تقصد أن حتى لو الموضوع صعب عليا وأنا مش هأقدر، فالمفروض أحاول وأجاهد، وأستعين بالله تعالى.. وما أفكرش في النتايج من قبل ما أحاول أصلا


غفرانك إلهي: بالظبط.. ما أنت بتفهم أهو
biggrin.gif


ياااااااا رب: بس ياض


غفرانك إلهي: فموضوع أنك غير التانيين ده انساه خالص ومالكش دعوة بيه، لأنه مش هيفيدك في أي حاجة بالعكس هيؤذيك..

تاني نقطة حكاية الحسد أو حتى السحر.. ماشي كلها احتمالات واردة، ربنا يحفظنا جميعا، بس برضه مش الصح أنك تخليها شماعة تعلق عليها أمورك

يعني مش كل ما الواحد يحصل له مشكلة في دينه أو دنياه يقول أنا اتحسدت.. لأنه كده برضه بيرمي الحمل على حد غيره فيبدأ يفكر بسلبية وأنه مش بإيده حاجة يعملها


ياااااااا رب: بس زي ما أنت بتقول يا أحمد أن دي حاجات واردة

غفرانك إلهي: تمام.. يبقى إذن نعمل إيه ؟

ياااااااا رب: برضه أنساها ؟

غفرانك إلهي: طب ليه بقى.. ما أنت هنا بإيدك حاجة تعملها.. مش كده ولا إيه؟

ياااااااا رب: ألا وهي ؟

غفرانك إلهي: ألا وهي تحصين نفسك بالله تعالى من الحسد ومن السحر.. مش عندك أذكار الصباح والمساء؟ وعندك الرقية الشرعية ؟ وعندك طرق تحصين النفس من الحسد والسحر وإزاي تقي نفسك من الأمور دي ؟


ياااااااا رب: ماشي كلام جميل.. يعني المفروض أبدأ ألتزم بالأذكار صباحا ومساء.. وأبدأ أخللي حد يرقيني وكده ؟

غفرانك: تمام أذكار الصباح والمساء مهمة جدا، بس تتقال بتركيز مش كروتة وخلاص.. لكن بالنسبة للرقية الشرعية بلاش تخللي حد يرقيك.. أنت ارقي نفسك أفضل..

ياااااااا رب: اشمعنى ؟

غفرانك إلهي: أيوة يا ماما

ياااااااا رب: ؟؟!!!

غفرانك إلهي: هههههههههههه.. معلش دي أمي بتنادي عليا فنسيت ورديت هنا.. هههههههه

ياااااااا رب: هههههههههههههههههههههه


غفرانك إلهي: طب بص يا خالد معلش.. أنا والدتي محتاجاني دلوقتي فلازم أقوم.. ينفع أكلمك بعدين ؟

ياااااااا رب: ماشي اتفضل.. بس أنا كنت عايز أعرف منك الرقية الشرعية والحاجات دي كويس

غفرانك إلهي: طب بص.. هأشوف والدتي وهأبقى أبعتلك إيميل إن شاء الله فيه الأذكار وفيه الرقية الشرعية كل حاجة إن شاء الله.. قشدة ؟

ياااااااا رب: قشطة
biggrin.gif
بس ماتتأخرش يا فندم


غفرانك إلهي: ماتقلقش هأحاول أبعتهولك الليلة إن شاء الله، أو بالكتير بكرة الفجر إن شاء الله.. معلش بقى

ياااااااا رب: ولا يهمك يا فندم.. في رعاية الله

غفرانك إلهي: ربنا يحفظك.. السلام عليكم ورحمة الله وبركاته

ياااااااا رب: وعليكم السلام ورحمة الله وبركاته.. سبحانك اللهم ربنا وبحمدك أشهد أن لا إله إلا أنت أستغفرك وأتوب إليك


نلقاكم في الحلقة القادمة إن شاء الله تعالى
 
أعلى