اتخرجت و خلصت جيش , طيب إزاي ألاقي على شغل ؟؟ ساعدوووووني

[engghost]

السلام عليكم و رحمة الله و بركاته

و بعد رحلة عذاب في الكلية 5 سنين ,
و في ميكانيكا بصفة خاصة

الحمد لله جبت تقدير : ج ج + مرتبة شرف ,
و طلعت الـ7 على القسم ,

و الحمد لله أنهيت الجيش و هستلم الشهادة كمان أسبوع إن شاء الله ,

لكن المشكلة إني مش عارف إزاي أدور على شغل ؟؟
مش عارف أصلا إزاي أعرف إن الشركات عاوزة مهندسين ؟؟

ياريت تساعدوني و تقولوا لي إزاي ابدأ أدور على وظيفة ؟؟
لأن الواحد حاسس بإحباط و يأس من أولها كده ,

في انتظاركم​

 

[B2000]

اخى الكريم الجرايد فيها شغل كتير. حاول انت بس وان شاء الله ربنا هيكرمك و نصيحه منى روح اى شغل يقع قدامك لان اى شغل هتلاقى اكيد فيه خبره حتى لو بسيطه و بعد كده لو لقيت حاجه احسن روح وربنا يكرمك ويكرم الجميع
و اتفضل الموقع ده فيه كل اعلانات الجرايد اللى طالبه شغل
http://www.moheet.com/jobs.aspx

 

[bido-egy]

انا نفس الحوار بس انا لسة في تالتة هندسة - قسم انتاج - هندسة شبرا

الحوار ده مقلقنى ومش عارف مجال محدد بحبه حابب كل حاجة

 

[م محمد المصرى]

السلام عليكم
الأول أبارك لك على تخرجك وقولك خليك متفائل أنت فى مجال تحسد عليه لو تحب تشتغل فى التكييف المركزى خلينا على إتصال بس ياريت ترد عليه بسرعه

 

[عبد الجبار]

اهوا يا عم ماشاء الله م محمد المصرى لاقى لك شغالنه على طول اهو

وبتقولوا بطالة ايه بس

تحيا مصر

 

[م/هيثم سعيد]

على فكره انا اتخرجت من الكليه وانا شغال مهندس فى مجال بعيد عن مجال تخصصى انا مهندس سيارات وشغال مهندس إنتاج فى شركة المطاحن الاقى عند اى حد يقولى اعمل إيه وانا مش قادر استحمل مع العلم ان المقابل قليل جدا وشكرا

 

[eng\wael]

والله ياجماعة السوق نايم الايام دى انا كنت شغال فى شركة حمامات سباحة ولكن كنت حاسس ان الخبرة فيها قليلة مع ان المقابل المادى كان كويس وروحت اشتغلت فى وزارة الكهرباء من غير واسطة ولاحاجة روحت قدمت فى شهر واحد وامتحنت واشتغلت فيها فى اول اربعة فى محطة توليد كهرباء غرب القاهرة ولكن بعد مااشتغلت فيها لاقيت المرتبات قليلة المرتب كله بكل حاجة 600 وشوية والحياة تساعد الواحد انه يكون مش بتاع شغل مفيش برنامج تدريبى نمشى عليه كل واحد يعتمد على فهلوته ويكون حيرك عشان يلقط معلومة من ده ومن ده والمشكلة الاكبر هى نظام الورديات نظام العمل فى كل محطات توليد الكهرباءبتشتغل يومين الصبح من 8الى3 ويومين الضهر من 3الى 10ويومين بليل من 10الى 8الصبح فيعملو الانسان عندنا زى الحيوان ازاى يقدر يشتغل ونظام حياته مقلوب بالمنظر ده بس الواحد بيقول احسن من القعدة فى البيت لغاية ما ربنا يفرجها

 

[عبد الجبار]

السلام عليكم ورحمة الله

أخى مهندس وائل أولا أسأل الله العظيم أن يقويك فى عملك وأن يرزقك أفضل من هذا العمل ويكون لك خيرا إن شاء الله

أما أخى بالنسبة لنظام الورادى هذا فكثير جدا من المهندسين يعمل بهذا النظام

وهذا قدر الله سبحانه وتعالى فلابد لنا جميعا أن نرضى به لأن قدر الله لا يأتى إلا بخير وعسى أن تكرهوا شيئا وهو خير لكم

وممكن أن تسثمر الوقت فى الاطلاع على الكتب المفيدة والعلوم المفيدة

والسلام عليكم ورحمة الله

 

[eng_srour]

http://www.dpmenet.com/
http://www.ecgsa.com
http://www.dargroup.com/flash/index_flash.php?isvars=false
دول كذا موقع لشركات استشارية بتحتاج مهندسين ميكانيكا جرب واسألهم

 

[msnaga]

البحث فى مواقع التوظيف

دى مواقع توظيف ، سجل فيها وابحث وان شاء الله تلاقى فرصتك:
www.monster.com
www.bayt.com
www.egyrec.com
www.gulftalent.com
وادخل على بحث جوجل واكتب موقع الغرفة التجارية الأمريكية Recruitment centre
والموارد البشرية العربية
وان شاء الله ربنا يوفقك ويوفق الجميع

 

[engghost]

اخى الكريم الجرايد فيها شغل كتير. حاول انت بس وان شاء الله ربنا هيكرمك و نصيحه منى روح اى شغل يقع قدامك لان اى شغل هتلاقى اكيد فيه خبره حتى لو بسيطه و بعد كده لو لقيت حاجه احسن روح وربنا يكرمك ويكرم الجميع
و اتفضل الموقع ده فيه كل اعلانات الجرايد اللى طالبه شغل
http://www.moheet.com/jobs.aspx

جزاك الله خيرا يا باشمهندس ,

بالفعل أنا بدخل على محيط كل يوم و بشوف الوظائف اللي في الجرايد و بقدم فيها ,

و ربنا يجعله بفايدة ,

و أنا مش معترض على أي شغل في الأول بدل القعدة في البيت , و أهو خبرة زي ما حضرتك قلت ,

 

[engghost]

انا نفس الحوار بس انا لسة في تالتة هندسة - قسم انتاج - هندسة شبرا

الحوار ده مقلقنى ومش عارف مجال محدد بحبه حابب كل حاجة

يا باشمهندس , ما تشغلش دماغك بالشغل قبل الأوان ,

على ما تخلص إن شاء الله و تتخرج و تخلص جيشك ربنا يفرجها ,

و بصراحة أنا شايف إن فرصتكم - كقاهريين - في إيجاد شغل بتبقى أكبر مننا - كخريجي أقاليم - علشان بتبقوا عايشين في القاهرة و عارفين الأماكن فيها و سوق العمل و كده يعني ,

و ربنا يوفقك و إيانا و يوفق الجميع .

 

[engghost]

السلام عليكم
الأول أبارك لك على تخرجك وقولك خليك متفائل أنت فى مجال تحسد عليه لو تحب تشتغل فى التكييف المركزى خلينا على إتصال بس ياريت ترد عليه بسرعه

و عليكم السلام و رحمة الله و بركاته يا باشمهندس محمد ,

و أعتذر و بشدة عن التأخر في الرد ,

و أعتذر مرة تانية لأن بصراحة مجال التكييف ده مافيش عمار بيني و بينه من أيام الكلية و المجال الوحيد اللي أنا حاطه في آخر أولوياتي بالنسبة للشغل ,
لأني بحس إنه ممل و تقليدي : حساب أحمال - حساب احتكاك و كميات هواء - باور للضواغط .... و هكذا ,

لكن شكلي كده مش هلاقي غيره في الآخر ,

عموما جزاك الله خيرا على الاهتمام و إنك دورت عليا ,

و إن شاء الله ربنا ييسر الأمور ,

و جزاك الله خيرا بجد يا باشمهندس محمد .

 

[engghost]

والله ياجماعة السوق نايم الايام دى انا كنت شغال فى شركة حمامات سباحة ولكن كنت حاسس ان الخبرة فيها قليلة مع ان المقابل المادى كان كويس وروحت اشتغلت فى وزارة الكهرباء من غير واسطة ولاحاجة روحت قدمت فى شهر واحد وامتحنت واشتغلت فيها فى اول اربعة فى محطة توليد كهرباء غرب القاهرة ولكن بعد مااشتغلت فيها لاقيت المرتبات قليلة المرتب كله بكل حاجة 600 وشوية والحياة تساعد الواحد انه يكون مش بتاع شغل مفيش برنامج تدريبى نمشى عليه كل واحد يعتمد على فهلوته ويكون حيرك عشان يلقط معلومة من ده ومن ده والمشكلة الاكبر هى نظام الورديات نظام العمل فى كل محطات توليد الكهرباءبتشتغل يومين الصبح من 8الى3 ويومين الضهر من 3الى 10ويومين بليل من 10الى 8الصبح فيعملو الانسان عندنا زى الحيوان ازاى يقدر يشتغل ونظام حياته مقلوب بالمنظر ده بس الواحد بيقول احسن من القعدة فى البيت لغاية ما ربنا يفرجها

ياباشمهندس وائل , زي ما بيقولوا : إن جالك الميري اتمرمغ في ترابه ,

و إن شاء الله المرتب يزيد بعد كده ,
و الاستقرار ميزة في الوظيفة دي ,

و أهو زي ما انت قلت برضه , أحسن من القعدة في البيت لحد ما ربنا يفرجها .

 

[engghost]

http://www.dpmenet.com/
http://www.ecgsa.com
http://www.dargroup.com/flash/index_flash.php?isvars=false
دول كذا موقع لشركات استشارية بتحتاج مهندسين ميكانيكا جرب واسألهم

جزاك الله خيرا يا باشمهندس ,

أنا فعلا دخلت على المواقع دي ,
و سجلت فيها أو بعت لهم السيرة الذاتية ,

و ربنا ييسر الحال ,

 

[engghost]

دى مواقع توظيف ، سجل فيها وابحث وان شاء الله تلاقى فرصتك:
www.monster.com
www.bayt.com
www.egyrec.com
www.gulftalent.com
وادخل على بحث جوجل واكتب موقع الغرفة التجارية الأمريكية recruitment centre
والموارد البشرية العربية
وان شاء الله ربنا يوفقك ويوفق الجميع

جزاكم الله خيرا على قائمة المواقع اللي ربنا يجعلها بفايدة ,

و جاري التسجيل فيهم إن شاء الله ,

لكن لي سؤال لأهل الخبرة بخصوص آخر موقع بتاع التوظيف في الخليج ,

هو كويس السفر خارج مصر في بداية الحياة المهنية ؟؟ خصوصا إن الخبرة = صفر ,
متهيأ لي الواحد هيتبهدل قوي ,

و لا طالما كده كده بهدلة في الأول يبقى نتبهدل هناك أحسن ؟؟

 

[midonagi]

مهندس محمد المصرى انا مهندس ميكانيكا باور دفعه 2007 ومشروعى كان تكييف مركزى وجبت فيه امتياز وحاليا بشتغل مهندس صيانة اجهزة معامل هندسية بس نفسى ومنى عينى اشتغل فى مجال التكييف المركزى وقدمت لأكتر من ككتب استشارى بس ربنا موفقش..ياريت لو تقدر تساعدنى انى اشتغل فى المجال اللى بحبخ وجزاك الله كل خير

 

[eng\wael]

جزاكم الله خيرا اخوانى الاعزاء
وربنا يوفق الجميع
يارب

 

[engghost]

مهندس محمد المصرى انا مهندس ميكانيكا باور دفعه 2007 ومشروعى كان تكييف مركزى وجبت فيه امتياز وحاليا بشتغل مهندس صيانة اجهزة معامل هندسية بس نفسى ومنى عينى اشتغل فى مجال التكييف المركزى وقدمت لأكتر من ككتب استشارى بس ربنا موفقش..ياريت لو تقدر تساعدنى انى اشتغل فى المجال اللى بحبخ وجزاك الله كل خير

ربنا يوفقك يا باشمهندس و تشتغل في المجال اللي بتحبه ,

أنا من واقع بحثي اليومين دول في الجرايد عن وظيفة بلاقي مهندس التكييف مطلوب بكثرة ,
فإن شاء الله تقدر تلاقي فرصة و تشتغل فيه ,

و ربنا يهيأ لنا الخير و إياك و المسلمين جميعا

 

[ابن النسر]

انا برضي مهندس ميكانيكا انتاج حديث التخرج 2008 لحد دلوقتي ملقتش حاجه وربنا يوفقنا
خصوصا السوق نايم اليومين دول